(1914) La Revancha
Ya el sol que tostaba el mundu
Co la carreta fogosa,
De los mares del Poniente
Diva cayendo nas folas;
Y rodiada de estrellines
Ya la fia de Llatona
Se asomaba pe los montes,
Galana y cariredonda,
Cuando ya los paxarinos
El bosque ombríu abandonan,
Y otra vez a sos guarides
Torna el melandru y la llondra,
Cuando subiendo a les ñubes
El fumeru de la choza,
Se güelven co la reciella
El zagal y la pastora,
Todo en seliquin estaba,
Solo un fresquillin que sopla
Respuende al mar que de lloñe
Retumba sordu e' na costa,
Cuando feridu de celos,
Sentadu sobre una roza,
Tal se quexaba Lisandru
Duna serrana de Ponga.
Si sabes, cruda Filena,
Que Pachu de Maruxona
Non ye más que un trastu vieyu
Que non gana la boroña;
¿Por qué tú, a min m'abandones,
Dime, rapaza simplona,
Por aquel cara de micu
Que non pudo afayar otra?
¿Como unos güeyos de gatu
Te desilumbran y namoran,
Y miós afanes y amores
Ansina pagas, traidora?
Mudable como la lluna,
¿Tu me desprecies agora,
Cuando tantes comenencies
Yo desdeñé por ti sola?
Dicir solíes, un tiempu,
Que del Poniente a l'aurora,
No había un mozu más guapu,
Ni más bizarra presona;
Estos güeyos matadores
Yeran un día tu gloria
Y te quemabes pensando
Que miraben a Llunora:
Non te pareci tan floxu
Cuando nel pradu de Antona
Alzaba yo en pendolina
En cada didu una arroba.
Riqueces, non digo nada,
Pues ya sabes que na Pola,
Tengo cien vaques de llechi,
Sin cuntar con la meyora,
Catorce cases en Lena
Venti faces en Piloña;
Si aun non te llenan el güeyu.
Tengo mil pesos de sobra.
Non me dirás que soy probe
Pa non me querer agora;
Que soi más ricu diez veces
Que el que llabró to deshonra:
El que tapa los remiendo
Con cintes de Covadonga,
Y non val una corbata
La so montera picona;
Mil trobes yo te cantaba
Pe les noches a deshora,
Que col nombre de Filena
Dexaba la vega sorda.
Di, perxura, non t'acuerdes
Aquel día na derrota.
Que pa que te dies el brazu
Facias la mellindosa?
A saber yo tos vileces,
Zalamera rapazona,
Non me viera enquillotradu
Tantes veces en to rona,
Nin corriera xirigates
Agayadu co la broma,
Que tantes noches me diste
Como ingrata y fiera lloba.
Non me dirás ¡raposina!...
Pero ya m'acuerdo agora,
D'aquel rabiosu llargatu
Que te mordió na gortona...
Ojalá, pícara, ingrata,
Que ya que lu quies, golosa,
T'aborrezca y lu rejasties
La primer nochi de boda,
Y los domingos y fiestes,
Desesperada y llorosa
Del ventanu de to casa
Lu veas con otra moza,
Y que toos con enfadus
Maldiciendo to memoria,
Te cubran de gatuperios
Como ñegra y alevosa.